CEBU, Philippines - Nagbuy-od nga wala nay kinabuhi ang lalaking maoy gitumbok nga drayber sa motorsiklong gisakyan ni Ian Canseco ang suspek sa pagkulata ug pagpusil patay kang PO2 Gerlito Estremos diha sa eskina sa dalan P. del Rosario ug Junquera sa barangay Camagayan sa milabay’ng semana.
Si James Flores, 27, giingong nakigpinusilay sa kapulisan atol sa gihimong follow-up operation diha sa Mangoville sa sitio Manggahan sa barangay Tisa, nakuha tupad sa iyang lawas ang usa ka kalibre 45 pistola.
Si Flores nga taga dalan Jakosalem St. nakaangkon og samad pinusilan sa iyang nawong, lawas ug kamot dihang gikaengkwentro ang mga sakop sa City Intelligence Branch, Police Station 2, ug Punta Princesa Police. Ang hepe sa kapolisan sa CIB Chief Insp. Romeo Santander mibutyag nga nakadawat sila og report kabahin sa presensya ni Flores kinsa daan na nilang gipangita may labot sa kamatayon ni Estremos nga nagburdo diha sa nahitaboan.
Ang Special Task Group nga gitahasan sa pagsulbad sa kaso ni Estremos daling miadto sa lugar ug ilang naabtan si Flores apan dihang gisita misirit kini og lakaw hinungdan nga gisinggitan kini ni sa luyoluyong hepe sa CIB nga si Sr. Insp. Keith Allen Andaya nga pahunongon.
Apan imbes nga mohunong giingong gipusil na hinuon sila niini hinungdan sa nahitabong ginukdanay ug pinusilay nga miresulta sa kamatayon ni Flores.
Sumala pa ni Santander nga ila lang gyud untang sikopon si Flores sama sa ilang pagsikop kang Ian Canseco apan misukol kini.
“Continuous follow-up operation gihapon ni bahin sa kang Estremos until such time na identify nato ang kuyog ni Ian, it so happen nga naa diri dapita ang suspect, accidentally wala man mi tuyo unta nga unsaon siya, in way nga parehas siya sa pag-handle namo sa among pag arrest ni Ian but we have no choice, it’s a judgement call. Siya’y na-una pagpabuto,†padayag pa ni Santander. Kagahapon, wala matiwas ang pagpasaka sa kaso batok ni Canseco diha sa City Prosecutors Office ug gitakdang humanon karong adlawa.
Sumala pa ni Santander si Flores maoy gitumbok sa testigo nga maoy drayber sa motorsiklo nga gisakyan sa killer ni Estremos niadtong Sabado sa kaadlawon.
Sa gihimong background check sa kapolisan, ilang nasayran nga si Flores ang giingong ‘runner’ ni Canseco nga nalambigit usab sa illegal drug business.
“We did double checking on our witness account. We went to the morgue and our witness positively identified James as the one who drove the motorcycle,†matod pa ni Santander. Ang hepe sa kapolisan sa dakbayan sa Sugbo, Sr. Supt. Mariano Natuel Jr., miingon nga bisan pa man sa pagkasikop kang Canseco ug pagkapatay kang Flores di pa nila tak-opan ang imbestigasyon.
Ang imbestigador sa Homicide Section SPO3 Rey Cuyos, mipadayag nga ila pang i-ballistics examination ang armas nga nakuha gikan ni Flores kung iya ba kini ni Estremos ug kun mo-match sa slug nga narekober diha sa crime scene sa polis.
Gawas niini, girekomendar usab ni Cuyos nga ipaubos sa paraffin test si Flores ug ipa-awtopsiya . (/EIM) (BANAT NEWS)