CEBU, Philippines - Nagkagubot karon sa lungsod sa Kauswagan sa Lanao del Norte sugod kagahapong adlawa human magpundok ang mga supporters sa mananaog nga mayor ug ang supporters sa incumbent mayor sa maong lungsod duol sa munisipyo.
Sumala pa sa report, ang mga supporters sa bag-ong midaog nga si Mayor-elect Rommel Arnado nagpundok diha duol sa munisipyo samtang ang supporters usab sa incumbent mayor nga si Casan Maquiling nagpundok usab duol sa highway sa maong lungsod.
Ang Vicar General sa Iligan nga si Msgr. Jemar Vera Cruz sa interview sa dzBB radio miingon nga grabe karon ang tensyon sa maong lungsod. Bisan ang mga transaksyon sa munisipyo nangabalda tungod niini.
Sumala pa nga gusto sa mga supporters ni Maquiling nga magpabilin kini sa pwesto tungod kay adunay disqualification order nga gipagawas batok kang Arnado. Si Arnado mibuntog kang Maquiling niadtong 2010 mayoralty race apan gibale sa Supreme Court ang desisyon ning bulan sa Mayo niini lang bulana. Apan ning milabay nga eleksyon sa 2013 giharos ni Arnado ang botos batok kang Maquiling.
"May order ang Supreme Court disqualifying the mayor who was elected in 2010. May disqualification order na nilabas last month. Pero ang mayor na disqualified, landslide winner sa 2013 elections," si Vera Cruz namulong. Sa pagkakaron gibuwag ang duha ka grupo pinaagi sa pagposisyon sa mga polis taliwala kanila aron dili sila mag-abot.