CEBU, Philippines - Namatay samtang gitabang sa mga doctor sa tambalanan ang kawani sa usa ka water works dihang gipusil kini sa usa ka wala hiilhing kriminal nga nagtaptap sa iyang nawong sa dayun na niining sakay sa iyang motorsiklo didto sa barangay Mantalongon sa lungsod sa Barili niadtong Biyernes sa alas 3:30 sa hapon.
Ang biktima mao si Jose Luis Subingsubing, 69, minyo, nagpuyo sa barangay Tubod ,Barili ug kawani sa San Isidro Labrador Water Works Association sa maong lugar. Samtang ang suspek gihulagway lang nga usa ka lalaki nga gamayon, gibana-banang 5â€2 ang gitas-on, kasarangan ang pamanit ug kulot ang buhok.
Si PO1 Ronie Guzman sa Barili Police Station dihang nahinabi sa Banat News nagkanayon nga ang biktima paingon na untang mosakay og balik sa iyang motor aron mopauli apan kalit nga miabot ang suspek nga nagtabon og towel sa iyang nawong.
Sa dihang tungod na kini sa biktima, gitangtang ang tabon nga towel sa iyang dagway. dayung bunot sa armas nga wala matino ang kalibre ug gipusil ang biktima sa makadaghanghigayon.
Nakaangkon og samad pinusilan sa nagkalain-laing bahin sa lawas ang biktima ,dayun nagdali nga gibiyaan sa suspek sakay og motorsiklo nga kolor itom ug walay plate number paingon sa lungsod sa Barili . (BANAT NEWS)