CEBU, Philippines - Napiyapi ang ulo sa patay’ng lawas sa usa ka albularyo nga gikulata ug pagkahuman gidakdakan pa gyud og dakung bato sa ulo sa 18- anyos niya nga ‘pasyenteng’ nalisoan sa maayong pangisip diha sa ilang balay sa barangay Hiloctog sa lungsod sa Barili niadtong Miyerkules sa alas 3:00 sa hapon.
Ang biktima mao si Sandallo Abarquez, 75- anyos, nagpuyo sa Sityo Kanlatombo, barangay Hiloctog.
Ang suspek kinsa nadakpan ug girekomendar nga ibutang sa mental hospital mao si Michael Ryan Flores,18- anyos ug nagpuyo usab sa maong lugar.
Matud ni PO2 Richard Cababat sa Barili Police Station nga nahinabi sa Banat News mianha sa ilang balay ang suspek aron magpatambal kay gituohang nalisoan sa pangisip tungod kay sigeng mapasaran sa kaon.
Apan samtang sila rang duha diha sulod sa balay mikalit og tukar ang sakit sa utok sa suspek ug gidiretso og sukmag ang nawong sa biktima ug kalit nga nag-wild.
Matud pang Cababat tungod sa kahadlok midagan si Abarquez paingon sa gawas apan gigukod kini sa suspek ug dihang naapsan gisukmag kini pag-usab hangtud nga nadagma , ug dihadiha mipunit ang suspek og dakung bato ug gidakdakan ang ulo sa albularyo.
Matud pa nga daling gitabang sa mga tawo ang biktima ug gidala sa Barili District Hospital apan tungod kay delikado ang kahimtang gibalhin kini sa Vicente Sotto Memorial Medical Center sa dakbayan sa Sugbo apan pagkaalas 8:00 sa gabii namatay gyud kini.
Atol sa hot pursuit operation sa kapulisan nasikop ang suspek pagka alas 5:30 sa hapon ug gipahiling dayun kini sa Barili District Hospital. Matud pa nga girekomendar sa mga doctor nga dad-on sa mental hospital ang suspek. (/EIM) (BANAT NEWS)