CEBU, Philippines - Patay nang naabot sa Gullas Memorial Medical Center sa Banilad ang Traffic Enforcer sa Cebu City Traffic Office Management human gipusil sa nag-inusarang mamumuno nga nagsakay og motorsiklo diha sa Archbishop Reyes Avenue sa barangay Banilad sa siyudad sa Sugbu kagahapon sa buntag.
Ang biktima giilang si Armando Dalidig, 47, residente sa Budlaan ning dakbayan kinsa nakaangkon og samad pinusilan sa iyang ulo ug dughan gikan sa calibre .45 pistola.
Usa ka nataktak sa serbisyo nga polis nga si PO3 Geoffrey Borinaga ang gidakop sa kapolisan pipila ka oras human sa hitabo.
Si Borinaga kinsa na-dismiss sa serbisyo tungod sa kalambigitan sa illegal nga drugas niadtong 2010 nadestino kaniadto sa Waterfront Police Station ug Police Regional Office-7 .
Si Borinaga giingong gitumbok sa saksi nga maoy miulo pagpusil patay kang Dalidig.
Ang hepe sa kapolisan sa dakbayan sa Sugbo Sr. Supt. Mariano Natuel Jr., mipadayag nga si Borinaga nasundan sa kapolisan nga daling miresponde kutob sa iyang iyang apartment sa Canduman 88 Village sa barangay Talamban.
Nakuha sa kapolisan sa iyang apartment ang gisuot niining camouflage shirt, sapatos ug ang motor ingon man ang kalibre .45 nga maoy gigamit sa pagpusil ni Dalidig.
Usa sa gisubay sa kapolisan mao ang panaglalis tungod sa trapiko.
Nagtuo si Natu-el nga posibleng gi-hire lang si Borinaga sa tawong gikalalis ni Dalidig.
Si Borinaga kusganong mihimakak nga siya’y mipusil kang Dalidig.
Gitakdang ipaubos sa drug test, paraffin test ug ballistic exam ang kanhi pulis.
Si CITOM assistant executive director Joy Tumulak nga gikahinabi sa Banat News diha sa VMMC miingon nga ilang subayon ang tanang mga rekord sa mga Temporary Operators Permits (TOP) ug mga citation tickets nga na-isyu ni Dalidig sa nanglabay’ng mga adlaw.
Matud pang Tumulak nga ilang tukion pagbalik sa CCPO ang sugyot nga mag-body-body system ang polis ug traffic enforcers sa pagpatuman sa lagda sa trapiko.
Ang igsuon sa asawa sa biktima nga si Michelle Abing kinsa diha usab sa maong tambalanan dako ang pagtuong “work related†ang motibo sa pagpatay sa iyang bayaw.
“Work related na siya, duna kuno siya’y nadakpang general man siguro to,†matud pang Abing sa mga tigbalita.
Si Dalidig adunay duha ka mga anak nga babaye nga nagpangidaron og 14-anyos ug 7-anyos nga miadto kagahapon sa maong tambalanan.
Ang ka-batch ni Dalidig nga si Zaldy Oportu mitug-an sa Banat News nga maayong tawo ang namatay. (/EIM) (BANAT NEWS)