CEBU, Philippines - Mobisita sa nagkalainlaing mga tunghaan sa Metro Cebu ang mga opisyal sa Land Transportation Franchising and Regulatory Board (LTFRB) ug Land Transportation Office (LTO).
Kini aron mopasabot sa kabataan ug mga tinun-an sa kamahinungdanon sa seguridad sa kadalanan ilabi na niining pagsugod na sa laing tuig tingtungha. Ang maong lakang kabahin sa gipatuman nga Oplan Ligtas Biyahe Balik Eskwela Program sa Department of Transportation and Communications (DOTC).
Atol sa 888 News Forum sa Marco Polo Plaza kagahapon, gipahibawo ni LTO 7 regional director Raul Aguilos nga ilang iatol sa flag ceremony ang ilang pagbisita.
Kini aron matudloan ang mga tinun-an sa mga angayang buhaton nga luwas diha sa kadalanan ilabi na nga kadaghanan sa mabiktima sa aksidenti sa kadalanan mao ang kabataan.
Gidasig usab ni Aguilos ang mga tinun-an nga mosumbong pinaagi sa LTO Facebook Account sa ilang mga reklamo sama sa dili paghatag og diskwento sa pletehan sa ubang mga drayber.
Sa iyang bahin si LTFRB 7 regional director Ahmed Cuizon mipahibawo usab nga ila gyud gihingusgan ang kampanya batok sa mga kolorum nga mga sakyanan sa mga tunghaan.
Matud pa ni Cuizon nga suportado na sa Department of Education sa ila himoong kampanya tumong sa pagpalukat og prangkisa.
Sa dakbayan sa Sugbo, adunay 234 ka yunit, Mandaue adunay 29, Talisay adunay 31, Lapu-lapu adunay 26 ka yunit ang nahatagan na og prangkisa sa LTFRB.
“Ang atoang mga prangkisado nga mga sakyanan ni-comply sa mga road worthiness standard sa LTO ingon man usab sa atoang standards sa atong buhatan,†matud pang Cuizon.
Adunay tulo ka butang aron mahatagan og prangkisa ang usa ka sakyanan sa tunghaan sama sa pultahan nga anaa sa toong bahin, may rihas ang bintana ug adunay fire extinguishers batok sa sunog.
“We are doing this in order to uphold the safety of our school children,†sumala pang Cuizon. (BANAT NEWS)