CEBU, Philippines - Mitimbang sa 113 ka kilo ang usa ka pawikan nga napalgang patay sa mga mananagat didto sa kadagatan sa lungsod sa Talibon kagahapon pasado alas 6:00 sa buntag.
Si Geoffrey Villamil, officer -in-charge (OIC) sa Coastal Resources Management Office (CRMO) sa Talibon mibutyag sa Banat News nga giguyod dayon sa mga mananagat ang maong pawikan sa baybayon.
Miingon si Villamil nga diha-diha ilang napahibawo ang Municipal Agriculture Office (MRO) ug ang Department of Environment and Natural Resources (DENR) sa maong lungsod kalabot niini.
Matud niya nga walay mga bun-og ang lawas niini ug gituohan nga nabunal lang kini sa mga bato ilawom sa dagat hinungdan nga nakuyapan apan nadayonan sa pagkamatay.
Apan dihang gitugyan sa mga opisyal ngadto sa lokal nga kagamhanan ang maong isyu, diha-diha mihukom si Mayor Restituto Auxtero sa Talibon sa pag-preserve sa maong pawikan, sumala ni Villamil.
Matud pa ni Villamil nga adto nila ibutang ang maong pawikan sa interpretive center sa Talibon.
Kini aron mahimong showcase ug masil-ing ra gihapon sa mga buot motan-aw niini.
Midugang si Villamil nga walay mga dagkong bawod sa dagat dihang nakita nila kini ug wala usay nagtuo nga nakakaon kini og hilo.
Nagkanayon si Villamil nga karon pa sila makakita og pawikan nga patay na sa ilang kadagatan sukad masukad.
Nasayran nga higpit nga gidili sa DENR ang pag-ihaw sa pawikan tungod kay usa kini ka matang may kinabuhi sa dagat nga nagnihit na sa pagkakaron. (BANAT NEWS)