CEBU, Philippines - Nasinatian na usab sa mga magtutudlo sa nagkalainlaing tulunghaan sa goberno dinhi sa lalawigan ang kakuwang sa lawak klasehanan sa unang adlaw sa pagbukas sa klase kagahapon.
Apan si Regional Director Carmelita Dulangon sa Department of Education (DepEd)7 miingon nga masulbad kini sa dili pa matapos kining tuiga.
Matud ni Dulangon nga nagpadayon na karon ang pinandayay sa mga edipisyo sa eskuylahan alang sa pagtubag sa suliran bahin sa kakuwang sa lawak klasehanan.
Nasayran nga kasagaran sa mga eskuylahan sa elementary ug high school mosagop sa “double shifting†nga klase aron maklasehan gayud ang tanang estudyante matag adlaw.
Kini pinaagi sa klase sa buntag nga gikan sa alas 6:00 ngadto sa alas 12:00 sa udto, ug ang ikaduhang shifting mao ang ala 1:00 sa hapon hangtud sa alas 6:00 sa gabii.
Miingon si Dulangon nga gawas sa duha ka shift nga klase, gitugotan lang una nga matag lawak sudlan og tag-55 ka mga estudyante nga dumalahon sa usa ka magtutudlo.
Kini tungod kay alang kang Dulangon temporaryo lamang kini kay inigkahuman sa mga edipisyo nga gitrabaho karon ibalhin na ang nagsugwak nga mga estudyante ngadto sa bag-ong mga lawak klasehanan. (BANAT NEWS)