CEBU, Philippines - Malampuson ang unang adlaw sa klase gahapon sa tibuok probinsya sa Sugbo matud sa Department of Education-7.
Butyag ni Dr. Arden Monisit, provincial schools superintendent, walay problema natala ug na report sa iyang opisina gikan sa mga field officers sa tibuok probinsya.
“Smooth kaayo atong opening of classes,†ingon si Monisit, kung kinsa miingon na sa ilang executive conference sa miaging semana, nagpahimangno siya sa mga district supervisors nga kinahanglang motambong gyud sa ilang mga kaakohan ang mga maestro, principals ug supervisors sa unang adlaw sa klase.
“All out ta karon, walay tawo sa division office,†butyag ni Monisit, ug hasta tanan medical officers, nurses ug dentista atoa na sa mga eskuylahan.
Wala sad magkuwang og mga classroom tungod kay daghan og gitukod nga mga edipisyo sa nangaging mga buwan.
Mipirma sad si Monisit sa miaging semana aron sa pag-hire og kapin nga usa ka libo ug kwatrosientos ka maestra alang sa probinsya. Sa pagkakaron adunay 10mil ka mga magtutudlo ang probinsya.
Samtang gipahibalo ni Acting Governor Agnes Magpale nga iyang i-renew ang mga provincially-funded nga dul-an duha ka gatos ka mga magtutudlo.
Mohangyo usab si Monisit sa mga mayor sa mga syudad ug munisipalidad sa probinsya nga i-renew sad ang ilang mga locally-funded teachers nga moabot dul-an usa ka libo.
Base sa records sa DepEd dul-an sa kinyentos mil na ang mga estudyante sa public schools sa probinsya ang na-enroll.
Gidugang ni Monisit nga iyang giingnan tanan principals nga makig-alayon sa mga brgy tanod, chief of police ug chief of executives aron masiguro ang seguridad sa mga eskwelahan ug mga estudyante.
Samtang hapsay usab ang pag-abli sa klase kagahapon nganhi sa siyudad sa Sugbo matud pa ni Dr. Danny Gudelosao ang officer-in-charge sa Department of Education Cebu City Division.
Matud ni Gudelosao nga nakasinati lamang sila og mga minor enrolment concerns sama sa mga transferees ug sa mga karaang estudyante nga kagahapon pa nagpa-enroll.
Apan matud ni Gudelosao nga aduna na silay standard operating procedure (SOP) niining problemaha kay masinati man gyud ni nila matag tuig.
Maong hangyo ni Gudelosao sa mga ginikanan nga sa sunod tuig, unta magpa-enroll sila og sayo-sayo sa ilang mga anak aron makasugod dayon sa klase. (/EIM) (BANAT NEWS)