CEBU, Philippines - Kapulisan sa tibuok probinsiya sa Sugbo mihulagway nga nagmalinawon ang pag-abli sa klase kagahapon.
Si Provincial Police Office Chief Sr. Supt. Patrocinio Comendador mitug-an nga sukad pagkabuntag hangtod sa hapon wala gyud silay natala nga insidente.
Ang nag-unang problema sa CPPO mao ang mga disgrasya sa kadalanan labi na kadtong mga eskwelahan nga anaa mahimutang daplin sa national ug barangay roads. Apan karon, nagpasalamat si Comendador nga walay natala.
“Nag-check man ko ganiha (kagahapon) in every school walay natala nga insidente,†matud niya.
Gipaninguha sa kapulisan nga dili na masubli ang nahitabong insidente sa miaging tuig diin usa ka estudyante ang naligsan sa usa ka sakyanan dihang mikaratil kini sa paglabang pag-abot sa eskwelahan.
Hugot nga seguridad ang gipatuman karon sa kapulisan ilabi na sa mga eskwelahan nga anaa mahimutang haduol sa dagat ug sa metro areas. Ang maong seguridad ipatuman hangtud pa sa sunod semana uban sa pag-abli sa klase sa pribadong tunghaan. Si Comendador midugang nga adunay pulis kada sugod ug kada human sa klase.
“Mao nay among puntirya karon nga naay pulis anang tingsulod ug ting-uli sa estudyante,†matud niya.
Samtang ang direktor sa Cebu City Police nga si Sr. Supt. Mariano Natu-el Jr. mibutyag usab nga nagmalinawon ang tibuok dakbayan sa Sugbo human wala siya’y nadawat nga alarma gikan sa mga ground commanders.
“Nagsuroy ko ganiha walay traffic congestion pero mag-expect mi nga mohuot ang dalan ini’g abli sa private schools on June 10 kay kada estudyante naa may sakyanan unya sa kadaghan ma-traffic na,†matud ni Natu-el.
Siya midugang nga nag-expect hinuon sila nga sa sunod semana mohuot ang kadalanan tungod sa pag-abli sa klase sa pribadong tunghaan.( /EIM) (BANAT NEWS)