CEBU, Philippines - Patay na nga nakit-an sa iyang ka-board mate ang 44 anyos nga lalaki kinsa gipatay sa wala hiilhing kriminal sulod sa giabangang lawak niini sa usa ka balay sa Sitio Alang-Alang, barangay Buanoy, lungsod sa Balamban kagahapon sa alas 3:45 sa kaadlawon. Ang biktima mao si Jimmy Badiang, 44, kinsa nagpuyo sa Alberto Gabica Residence , sa maong lugar, apan lumad nga taga Surigao Del Norte.
Si PO1 Donard Pitogo sa Balamban Police Station mibutyag sa Banat News nga ang ka-board mate sa biktima nga si Onisemo Codiz, 26, ulitawo maoy misumbong kanila nga kalit siyang nahigmata gikan sa pagkahinanok sa pagkatulog human mabati ang sipa kaayong buto sa armas de fuego gikan sa giabangang lawak sa biktima. Dali niya kining gisusi ug didto iyang nasuta ang biktima nga nagbuy-od sa sawog nga adunay samad pinusilan sa buko-buko , hinungdan nga gi-report dayun niya sa kapolisan .
Sa sulod sa lawak sa biktima nakapunit ang mga polis og usa ka kabhang sa bala ug usa ka lumping nga bala sa kalibre .45 nga pistola. Dihang gihiling sa kapolisan ang bulsa sa biktima nakuha usab nila gikan niini ang usa ka pakite sa gituohang shabu
Ang kapolisan sa maong lungsod padayon pa sa ilang pag-imbistigar sa maong hitabo ug pag-ila sa kriminal ingon man ang motibo sa maong krimin.
Apan may katahap ang mga otoridad nga illegal nga drugas ang hinungdan sa maong krimin base sa nakuha nilang shabu gikan sa bulsa sa biktima. WC (BANAT NEWS)