CEBU, Philippines - Upat ka lalaki ang nadakpan sa Provincial Intelligence Branch (PIB) sa Cebu Provincial Police Office atol sa gipahigayong buy-bust operation diha sa barangay Looc dakbayan sa Danao.
Ang nasikop mao silang Roque Casas, 49; Archie Gaco,29; Isidro Casas. 44; ug Roque Allan Pasay, 49, nga pulos molupyo sa nahisgutang dapit. Matud pa sa team leader sa maong operasyon nga si Sr. Insp. Leo Logroño, nga nakadawat sila’g taho sayo pa sa miaging gabii kalabot sa pagpamaligya og illegal drugs ni Roque Casas ug sa usa ka Dennis Avila.
Atol sa buy-bust operation silang gipalitan si Roque Casas og bali’g P200 nga kantidad nga shabu dihang gitunol kini niini dali siyang gisikop. Wala usab makaugpo ang laing tulo ka kaubanan ni Roquez nga giingong naabtang “nagdakop-dakop†(suyop) sa aso sa gituohang shabu. Samtang ang usa ka subject sa kapolisan nga si Avila dali usab nga nakasibat human makabantay nga adunay polis sa ilang lugar.
Ang mga dinakpan nga gikuhaan sa ilang habig managlahi og mga tubag. Si Roque Casas miingon nga mamorsiyento ra siya sa drugas ug nasud siya niini tungod sa kawad-on. Samtang ang ig-agaw niining si Isidro ug pag-umangkong si Archie, pulos miingon nga naamong lang sila tungod kay diha sila nangatulog. Giangkon hinuon niyang tiggamitan siya og illegal nga drugas apan wala sila manuyop nianang tungora. EIM (BANAT NEWS)