Mga ‘hawsyaw’ sa BOC kutob na lang karong semanaha

CEBU, Philippines - Gipatangtang ni Bureau of Customs Commissioner Rozzano Rufino “Ruffy” Biazon sugod karong Lunes Hunyo 3 ang tanang “hawsyaw” nga mga trabahante sa Cebu Customs Port of Cebu. Kini nga kamandoan gipaabot sa memorandum ni Biazon niadtong petsa 21 ning bulana nga nagmandong tangtangon ang ang mga non-organic ug non-contractual personnel o “hawsyaw” sa maong buhatan. Kini gumikan sa mga nadawat nga reklamo ni Biazon nga ang moatubang sa mga kliyente mao kining mga tawhana nga dili mga kwalipikado ug ang uban giingong nalambigit pa sa mga pagpangilkil.

Gibaharan ni Biazon ang mga pangulo sa matag departamento nga sundon ang maong kamandoan.

Kadtong dili motuman niini tungod kay nawili sa ilang mga hawsyaw nga sulugoon hayan mag-atubang og kasong kalapasan sa Customs Code of Conduct base sa CMO 25-2010 ug kalapasan sa R.A. 6713 o Ethical Standards of a Public Officials and Employees.

Tungod niini,si Cebu Customs District Collector Edward dela Cuesta mitahas ni ESS Customs Police District Commander Maj. Camilo Casculan Jr. sa pag-implementar sa maong kamanduan.

Sugod karong Lunes, wala nay makasulod nga di organic nga kawani sa BOC o kadtong mga walay ikapakitang identification cards nga sila tinud-anay nga mga kawani sa gobiyerno. (BANAT NEWS)

Show comments