CEBU, Philippines - Angol ang usa ka ulitawo kinsa gipusil sa iyang mga kontra samtang mangasilyas unta kini didto sa Sitio Gen. Genes, sa Brgy.Pasil ning dakbayan sa Sugbo kagahapon sa alas 8:30 sa buntag .
Ang biktima giila nga si Warlito Laborte, 29, taga Pasil samtang ang suspek mao sila si Daniel Ongcol, 29, construction worker ug Ariel Gomez, 36, dispatcher, molupyo sa Sitio Balagtas, Panganiban St. Brgy. Pahina Central ning Syudad sa Sugbo.
Sa inisyal nga imbestigasyon nga gipangulohan nila ni SPO1 Victor Ruel Ayuman, PO1 Michael Angelo Singson ug PO1 John Errick Samosa, nasayran nga ang biktima nagpadong na sa pansayan pagtubag sa sugo sa lawas pipila ka metro gikan sa ilang balay, dihang kalit lang gipusil sa mga suspetsado
Ang inahan sa biktima nga maoy misumbong dayon sa kapolisan nagkanayon nga kagahapon sa alas 3:00 sa buntag migawas siya uban sa iyang anak kay mopalit og tubig apan gibabagan kini sa mga suspek.
Kagahapon sa buntag dihang padong sa pansayan ang biktima giluthang na gyud kini sa mga suspek.
Samdan sa tiyan ug tuong kamot gihatud dayon sa tagtungod ang biktima ngadto sa Cebu City Medical Center.
Samtang sa hot pursuit operation nga gipahigayon sa kapolisan sa San Nicholas nga gipangulohan ni SPO1 Francisco Balansag nasikop dayon ang mga suspek.
Nasuta sa kapolisan nga dumot ang hinungdan sa pagpamusil. Nasakmit gikan kanila ang usa ka 9mm nga pistola, 18 ka buhing bala ug usa ka lumping nga bala.
Sa pagkakaron nagkagulkol na sila sa prisohan samtang gipaabot ang tukmang kiha nga isang-at batok kanila. (BANAT NEWS)