CEBU, Philippines - Ang pagtukod og opisyal nga puwersa sa mga salbador sa katawhan sa panahon sa katalagman maoy tinguha sa bag-ong hepe sa Provincial Disaster Risk Reduction and Management Council (PDRRMC).
Si PDRRMC Chief Neil Sanchez mibutyag sa Kapihan sa PIA kagahapon nga iyang tigomon ang tanang mga gitudlo nga hepe sa disaster management council (DMC) matag lungsod ug siyudad karong sunod buwan aron hisgotan ang maong isyu.
Matud pa ni Sanchez nga iyang paabuton nga molingkod ang mga hepe ehikutiba sa lokal nga kagamhanan aron kasugdan niya ang dako niyang kaakohan sa pagkompleto sa DMC matag lokal nga kagamhanan.
Si Sanchez nga kanhi hepe sa Office of Civil Defense (OCD) ug niadto lang Disyembre 2012 midawat sa tanyag isip hepe sa PDRRMC, nagkanayon nga sa tanang lungsod ug syudad sa lalawigan sa Sugbo, 70 porsento pa lang ang may kompletong puwersa sa DMC ug ang labing nakatuman sa maong kasugoan mao ang lungsod sa San Franciso sa isla sa Camotes ug gisundan sa dakbayan sa Talisay.
Miingon si Sanchez nga gumikan kay bag-o man ang pamunoan sa lokal nga kagamhanan sugod sa Hulyo, gipaabot niya nga may mga hepe na usab nga tinudlo nga midumala sa DMC sa kalungsoran ug syudad nga mahimong ilisan ilabi na kun ang mayor sa maong lugar bag-ong napili.
Nalantawan ni Sanchez nga dako ang iyang sagubangunong suliran aron mamontar pag-ayo ang DMC sa matag lungsod ug syudad. Alang kang Sanchez nga tungod kay usa man ka balaod ang katukoran sa DMC, nagkinahanglan kini og mga permanenteng mga tawo nga ibutang sa linain usab nga opisina niini sa matag lungsod ug siyudad.
Lahi sa pagkakaron nga walay klarong mga kawani ang DMC, ug inig-abot sa katalagman ang barangay captain o mayor mao na lay mangunay sa pagpanawag sa kapolisan, barangay tanod, ug uban pang opisyal ug kawani sa lungsod aron tabangon ang mga nasugamak sa katalagman.
Ang DMC maoy pundok nga gitahasan sa balaod nga mosalbar sa katawhan sa panahon sa katalagman sama sa baha, dahili sa yuta, linog, tsunami, sunog ug uban pa.
Apan miingon si Sanchez nga kasagaran sa mga mayor maglisud sa pag-hire og ibutang sa buhatan sa DMC tungod kay puno na ang quota niini.
Nasayran nga matag human sa election, ang mayor ug mga konsehal may quota sa gidaghanon sa kawani nga patrabahuon nila sa ilang buhatan. Si Sanchez kinsa miangkon nga mibalhin siya sa PDRRMC gikan sa OCD tungod kay gitanyagan siya og mas dako nga insentibo sa kagamhanan sa lalawigan , nagkanayon nga sa pagkakaron gigahinan sa Kapitolyo og P98 milyones ang PDRRMC aron magamit sa tanang kalihokan niini gikan sa pagbansay ug hangtod sa mga gastoanan sa aktuwal nga mahitabo panahon sa katalagman. (BANAT NEWS)