CEBU, Philippines - Napulo ka mga draybers sa pang publikong sakyanan ang nasakpang tiggamitan og illegal nga drugas human sila napositibo sa random roadside drug testing nga gipahigayon kagahapong adlawa sa siyudad sa Naga nga gipanguluhan sa Land Transportation Office-7 ug sa Cemex Corporation.
Matud pa ni LTO-7 regional director Raul Aguilos, nga 150 ka mga draybers sa mini-bus ug multi-cab drivers ang gi-random drug test ug napulo niini positibo gayud nga naggamit og shabu.
Nunot niini, awtomatikong gi-revoke ang ilang mga lisensya ug girekomendar nga ipa-rehabilitate.
"Makabalik ra sila og drive if after six months they can show proof that they undergo drug rehabilitation, pay the P10,000 fine and a drug test result showing they are negative na," matud pa ni Aguilos.
Ang pagpahigayon sa maong drug testing apil kini sa selebrasyon sa Road Safety Month karong bulana ug ingon man preparasyon kini sa pag-abli sa klase karong Hunyo 3.
"This is just a series of road safety activities being undertaken by LTO and Cemex corporation to promote safety advocacy," matud pa ni Aguilos.
Giawhag usab sa LTO-7 ang mga dagkong establisimento sama sa Cemex Corporation nga makig-partner kanila alang sa promosyon sa road safety sa ilang tagsa-tagsa nga trabahuan ug kumunidad ug ingon man parte sa ilang road safety for all program. (/EIM) (BANAT NEWS)