CEBU, Philippines - Miduso na sa iyang resignation ang usa sa unom ka department heads nga giingong migawas dihang nagpatawag og meeting nga gihulagway nga loyalty check si Mayor Michael Rama.
Si Cebu City Legal Office chief Atty. Joseph Bernaldez mi- resign usa ka adlaw human modaog si Rama.
“I have already tendered my resignation dated May 15 effective June 30. Based on protocol, a co-terminus employee has to resign at the end of a term,†si Bernaldez namulong.
Si Konsehal Joey Daluz, kaalyado sa mayor kinsa mibakasyon sulod sa 22 ka adlaw, miingon nga wala pa pirmahi ni Rama ang resignation letter ni Bernaldez.
Wala na mitunga sa iyang opisina si Bernaldez tungod kay matud niya iyang gigamit ang iyang 120 ka adlaw nga leave credit nga nagtipun-og sukad siya nagsugod sa city hall niadtong 2005.
Siya gikataho nga migawas sa opisina ni Rama niadtong Abril 17 dihang nagpatawag kini og pulong aron matud pa paghimo og loyalty check sa iyang mga department heads.
Kauban niyang migawas sila si Department of Veterinary Medicine and Fisheries (DVMF) chief Dr. Alice Utlang, City Treasurer Emma Villarete, Human Resource Department Office chief Atty. Evangeline Abatayo, Internal Control Office chief Arlene Rentosa, ug ni City Department of Manpower Development and Placement (DMDP) chief Fidel Magno.
Si Rama mihimakak nga loyalty check ang nahitabo.
Ang laing lima ka department heads nagpabiling hilom kalabot sa resignation ni Bernaldez ingon man sa ilang mga plano hayan mosugod ang ikaduhang termino ni Rama. Usa kanila miingon nga siya nagpaabot na lamang nga ibalhin sa laing opisina tungod kay nagdahum na gyud sila nga mao kini ang mahitabo.
Si Bernaldez, matud niya, mo-focus sa pagka abogado labi na kay daghan na siya’g tanyag gikan sa mga pribadong kompanya. (BANAT NEWS)