CEBU, Philippines - Kritikal ang usa ka lalaki human gidunggab sa iyang ig-agaw didto sa Sitio San Isidro II, Brgy. Mabolo ning syudad sa Sugbo alas 7:40 sa miaging adlaw. Ang biktima giila nga si Ramil Arcipe, 42, tigbulkit ug molupyo sa maong lugar samtang ang suspek giila nga si Jasting Rosos, 40, kauban ra niya sa vulcanizing shop. Matud sa kapuyo sa biktima nga si Estrella Alconera nakig-away ang suspek sa lain pang kauban nila sa vulcanizing shop tungod kay nasuya kini nga mas dako kini og kita itandi kaniya. Dihang giuwang sa biktima gidunggab hinuon siya niini. Ang biktima nalandig sa Cebu City Medical Center samtang ang kapolisan padayon pa sa pagpangita sa supek kinsa daling miikyas human sa krimen. (BANAT NEWS)