CEBU, Philippines - Usa ka doktora ang gibati og kalisang human kini padalhi og usa ka tiil sa baboy nga dunay gipaungot nga ablidor nga gisulod sa usa ka paper bag.
Base sa report sa Balitang Bisdak ang maong tiil sa baboy nga sulod sa paper bag gisangit sa door knob sa pultahan sa klinika sa doktora kinsa wala hinganli tungod sa iyang seguridad.
Ang sekretarya sa maong doktora ang daling mitaho sa kapolisan diha sa Fuente Police Station kabahin sa maong insidente.
Si Chief Inspector Renero Agustin, hepe sa Fuente Police Station nagkanayon kini nga usa ka death threat ang gipadala tungod kay gipaungot man ang ablidor diha sa tiil sa baboy.
Ang kapolisan mipahigayon og imbestigasyon sa maong hulga sa doktor. (BANAT NEWS)