CEBU, Philippines - Usa ka intelligence officer sa kapolisan ang mag-atubang og kasong Serious Neglect of Duty tungod sa giingong wala niini pagpakita sa hearing isip prosecution witness sa usa ka kaso kabahin sa illegal nga drugas.
Ang Directorate for Investigation and Detective Management sa national headquarters mimando sa pag-imbestigar kang PO2 Roy Lofranco human ma-dismiss ang kaso batok kang Felix Caballero.
Si Lofranco gi-subpoenahan na sa makadaghang higayon aron patambongon sa hearing sa Regional Trial Court, Branch 13 niadtong Octobre 19, Nobiyembre 9 ug Disyembre 7 nga pulos alas 3:00 sa hapon apan wala gyud mopakita si Lofranco diha sa korte.
Mipadala na usab og warning ang korte kang Lofranco apan wala gihapon kini mipatim-aw. Si Lofranco mirason nga aduna silay gi-serve nga warrant of arrest nianang mga panahona apan matud sa korte nga dili kini igong rason kay ang pag-serve sa warrant mamahimo mang sa sunod adlaw na. Ang korte mipahigayon og laing hearing adtong Pebrero 8 ug 22 apan wala lang gihapon motunga si Lofranco hinungdan nga na-dismiss ang maong kaso.
Sa pre-charged evaluation nga gipahigayon sa Provincial Investigation and Detection Management Branch (PIDMB), si Lofranco nakalapas sa Rule 21, Section 2 of the National Police Commission Memorandum Circular 2007-001.
Ang PIDMB mo-endorso sa resulta sa maong kaso ngadto sa Police Regional Office (PRO)-7 alang sa pagpahigayon og summary hearing. (BANAT NEWS)