BACOLOD CITY, Philippines —Duha ka mga tawo ang gipamatay, usa kanila pilderong kandidato sa pagkakonsehal ug tulo usab ang angol sa nahitabong pagpamusil sa lungsod sa Don Salvador Benedicto sa Negros Occidental niadtong Miyerkules.
Giila ni Senior Superintendent Ricardo de la Paz, acting Negros Occidental police provincial director, ang mga namatay mao sila si Roland Apellido ug Gotelio Sabay, ang mga naangol mao sila si Alfredo Edem, Julie Toledano ug Isagani Sagno.
Si Apellido, naparot pagkakonsehal ug kaalyado ni Mayor-elect Jose Max Ortiz, samtang si Sabay political supporter sa naparot usab nga si Mayor Laurence Marxlen De la Cruz.
Si Apellido naigo sa ulo samtang grabe si Sagno nga bodyguard ni Apellido, dihang nagkapinusilay sa mga supporters ni De la Cruz sa Spur 16, Barangay Bunga sa maong lungsod.
Base sa imbestigasyon nag-abot ang duha ka grupo sa usa ka painitan sa Crossing Spur 16 ug nagkainitay og lalis ug misunod ang butobuto sa armas. Giingong si Sabay napusilan ni Sagno.
Ang kapolisan padayon pa sa ilang imbestigasyon sa maong hitabo nga gihulagway nga politically motivated. (/EIM) (BANAT NEWS)