CEBU, Philippines - Dul-an sa P200,000 nga salapi, ug mga alahas ang nadala sa mga kiriwang mangingilad nga nagpakaaron-ingnong mananambal ug nakailad sa usa ka ginang diha sa 568 Sitio Subina, Brgy. Guadalupe dakbayan sa Sugbu kagahapon.
Ang biktima giila nga si Flordiliza Santillan, molupyo sa nahisgutang lugar kinsa igo na lang midangop sa presinto aron mosumbong tungod sa nahanaw niyang mga alahas ug cash gikan sa usa ka mini diay nga ‘tambalan.’
Sa gihimong imbestigasyon ni PO3 Mark Betonio sa Theft and Robbery Section sa Cebu City Police Office, ang biktima mibutyag nga giduol siya sa usa ka itumon ug taasong babaye nga gibanabanang 40-anyos.
Matud pa nga ang babaye miingon sa biktima nga “dunay nanaot kaniya†ug pinaagi sa espesyal niyang habak nga maoy sudlan sa gipangsuot nga bulawang alahas sa biktima di na makaatraka pa ang mga dautan.
Tuod man nadani si Santillan ug gitunol iyang mga alahas ug gipakita pa siyang gisud kini didto sa habak ug dayon gibutang sa maong babaye ang habak sa balay sa biktima ug milakaw.
Diha na lang nabantayan sa biktima nga wala diay sud ang habak ug wala diha ang iyang mga alahas ug kwarta hinungdan nga igo na lang siyang midangop sa kapolisan. (BANAT NEWS)