CEBU, Philippines - Usa ka granada ang nakit-an sa duha ka bata daplin sa dan sa Brgy. Binabag syudad sa Bogo sa miaging adlaw.
Ang mga nakakita mao si Astrophel Ysip, 12, ug Jojo Sarsalejo,13, mga molupyo sa maong lugar.
Base sa imbestigasyon sa Bogo City Police Station pauli na niadto ang duha ka menor de edad gikan sa tunghaan sa Binabag Elementary School aron maniudto dihang ilang nabantayan sa ilang paglakaw ang maong eksplosibo.
Hinuon sumala pa sa kapolisan gitaya na kini apan diha kini makit-i 50 metros gikan sa tunghaan nga usa sa mga polling precincts sa eleksyon ugmang adlawa.
Gikompirmar ni Supt. Anthony Bagarinao, hepe sa Bogo Police Station nga usa sa mga voting centers ang Binabag Elementary School.
Ang granada gihipos na sa kapolisan ug gisusi pa kung may kalambigitan ba sa piniliay sa maong insidente. (Chelsea Quijano/Queenee Anne Vidal-CNU Intern/EIM) (BANAT NEWS)