CEBU, Philippines - Kanhi Cebu City mayor Alvin Garcia mibutyag nga walay kamatuoran ang pangangkon ni Congressman Tomas Osmeña nga mao kini ang amahan sa Information Technology (IT) sa Sugbo ug labaw nga dili tinuod nga siya maoy naghago sa katukoran sa South Road Properties (SRP).
Gibutyag ni Alvin Garcia nga siya maoy tinud-anay nga milihok kaniadto dihang siya pa maoy mayor pinaagi sa pag-agni sa mga negosyante pag-invest sa information technology sama sa pagtukod og mga call centers, apan wala kini suporta gikan ni Osmeña.
Si Garcia maoy nagpasiugda sa Cebu IT Summit didto sa Marriot Hotel niadtong tuig 2001 nga ang tumong mao ang paghimo sa Sugbo isip IT Capital sa nasud. Maong duna karo’y daghang mga call center companies sa siyudad.
Samtang iyang giklaro nga sa iyang termino gisugdan ug nahuman ang katukoran sa SRP.
Gisaway usab niya ang pagbaligya ni Osmeña sa yuta sa SRP ngadto sa Phil-Invest nga gitukoran karon og condominium tungod kay ang mga adunahan ra man gihapoy makasapi ug makabenepisyo niini.
Si Garcia nagkanayon nga mas angayan nga himuon ang SRP nga usa ka IT Park, Export processing Zone, ug Light Industrial Park aron makahatag og dugang trabaho.
Giklaro hinuon ni Garcia nga wala siyay ambisyon nga mokupot pag-usab sa renda sa siyudad o bisan unsang posisyon sa gobiyerno tungod sa iyang pagbutyag sa kamatuoran. (BANAT NEWS)