CEBU, Philippines - Suspek sa pagpatay sa kaugalingong amahan nadakpan sa kapolisan diha sa barangay El Pardo sa lungsod sa Boljoon niadtong miaging adlaw sa alas 3:19 sa hapon.
Ang suspek nga nagtingkagol na karun sa karsel mao si Michael Romaguera, 30, kinsa gipasanginlang miunay sa pagpatay sa iyang amahang si Lomino Romaguera, 66.
Nahitabo ang krimen sa miaging tuig apan karun lang bag-o nalutsan og warrant of arrest sa kasong parricide ang suspek nga giisyu ni Regional Trial Court RTC Branch 26 Judge Maximo Perez.
Matud ni PO1 Rex Pelonio sa Boljoon Police dihang nahinabi sa Banat News, pulos hubog ang manag-amahan dihang nahitabo ang krimen. Matud pa gibunalan og kahoy sa biktima ang suspek apan sa kapungot sa naulahi napungot kini ug mikuha og alho ug gihapos kini sa ulo sa amahan. (BANAT NEWS)