CEBU, Philippines - Naglunang na sa kaugalingong dugo ang usa ka biyuda dihang napalgan nga may mga samad pinusilan sa lawas pasado alas-9 sa miaging gabii diha sa sitio Masaba sa barangay Tagbao sa dakbayan sa Sugbo.
Ang biktima nailhan nga si Virgilia Rota Bontilao, 66, usa ka biyuda ug mag-uuma sa maong dapit. Si Bontilao nakaangkon og samad pinusilan sa dughan, likod nga bahin sa iyang lawas ug sa iyang kamot.
Tungod kay wala’y laing tawo nga nakakita sa krimen gawas sa bag-ohay pa nauli nga katabang sa biktima nga si Jake Pepito Petigo,19, gipaubos siya sa usa ka paraffin test.
Si Petigo kinsa gikan pa nagduwa og billards mibutyag sa mga imbestigador nga nahibulong siya pag-uli nga abli na ang main door sa balay.
Sa iyang pagsusi, nakit-an niya ang patay’ng lawas sa biktima nga nagbuy-od na ug nagkadugo maong gipamukaw niya ang mga apo sa tiguwang ug mitawag sa mga silingan aron pagpangayo og tabang.
Na-recover diha sa crime scene mao ang tulo ka slugs ug tulo ka kabhang sa kalibre .45 nga posibleng maoy gigamit sa mga kriminal.
Si PO1 Merlo Laborte mibutyag sa Banat News nga ilang gipaubos sa paraffin test ang helper sa biktima tungod kay siya ra man ang bugtong nakakita sa crime scene ug mao ray hamtong sa balay nianang tungora.
Nakadawat usab sila og impormasyon nga nakasab-an sa biktima si Petigo sa miaging semana.
Sa pagkakaron wala pay klarong lead ang kapolisan sa motibo sa maong pagpatay tungod kay walay timailhang gitulis kini. (BANAT NEWS)