CEBU, Philippines - Usa ka lalaking gipasanginlang kawatan ang gipusil patay sa duha ka silingan diha sa Proper Ermita, barangay Ermita ning dakbayan sa Sugbo kagahapon sa buntag.
Ang biktima giila nga si Argie Nodalo, 25, way trabaho ug molupyo sa nahisgutang lugar samtang giila ang mipusil kaniya mao sila si Gally Secretaria ug Keith “Takomo†Panes .
Matud ni Bambi Lopez, 21, manikurista ug kapuyo ni Nodalo nga nakasaksi sa panghitabo giduol sa mga suspetsado si Nodalo ug gipasanginlan kining nangawat og kwarta ug “shabu†sa pinuy-anan ni Secretaria.
Giingong dihang mibalibad si Nodalo kalit kining gipusil sa duha unom ka higayon. Ang biktima daling gidala sa Cebu City Medical Center apan patay na kini tungod sa samad pinusilan sa walang bahin sa dughan, tuong hawak ug walang bahin sa likod sa dunggan niini.
Sa imbestigasyon nga gipangulohan ni SPO1 Rainer Mahinay ug sa mga sakop sa Carbon Police Station lima ka basiyo sa bala sa kalibre .45 ang nakuha sa crime scene.
Wala pa madakpi ang mga suspetsado kinsa daling miikyas human sa krimen. (Chelsea Quijano, CNU Intern/EIM) (BANAT NEWS)