CEBU, Philippines - Gihimakak sa tsirman sa Cebu CFI Community Cooperative Judge Esperanza Garcia ang pasangil ni Barili Mayor Teresito Mariñas nga gigamit sa CFI ang P2 bilyones nga kwarta nga gi-loan sa Landbank aron gamiton sa pagpangampanya.
Kahinumdoman nga nagpadala og suwat si Mariñas ngadto sa CFI sa miaging adlaw kalabot sa 90 ka mga miyembro niini ug mipahibawo nga dili ipagamit ang kwarta sa kooperatiba ngadto sa politikanhon nga katuyuan. Ang maong suwat gilangkoban og mga pirma sa giingong mga miyembro niini apan wala kini mga pangalan nga gilista.
Matud ni Atty. Lito B. Astillero, usa sa mga board of directors sa CFI nga pwedeng susihon ni Mariñas ug sa mga miyembro niini ang record sa kooperatiba tungod kay ilaha kining katungod.
Dugang usab ni Astillero nga 43 na ka tuig ang CFI apan wala kini mag-apil-apil sukad sa pulitika.Si Ramon Dumayac nga miyembro usab sa board of directors sa maong kooperatiba mibutyag nga ang gi-loan sa CFI gamiton alang sa expansion sa kooperatiba.
Ang CFI gitagaan sa Landbank og P3.5B nga credit loan apan wala kini magpasabot nga kausahon ra nila pagkuha. (Kristianne Marie Alcaria, CNU Intern/EIM) (BANAT NEWS)