CEBU, Philippines - Ang Catholic Conscience Vote Philippines miendorsar og unom ka mga kandidato pagka senador nga ilahang suportahan karong umaabot nga eleksiyon sa Mayo 13, 2013.
Ang unom mao sila kanhi kongresista ug Team P.Noy senatorial candidates Cynthia Villar, Senador Antonio Trillianes, Senador Aquilino Pimentel sa United Nationalist Alliance. Suportahan usab sa CCVP ang kandidatura sa tulo ka kandidato sa Kapatiran Partylist nga sila si Lito David, Marwil Llasos ug JC de los Reyes.
"I am so happy on this. The Catholic votes are shaping up. Now the Church is moving in one direction," matud pa ni David nga nibisita sa buhatan sa The Freeman kagahapong adlawa.
Ang CCVP secretary-general nga si Antonio Ag. Medina sa iyang statement nagkanayon nga ilahang gi-endorsar si Villar tungod sa iyang kusganong pakigbisog alang sa pagpreserbar sa kinabuhi ug proteksiyon sa pamilya.
Sila si Villar, Pimentel ug Trillanes gi-endorso usab sa White Vote Movement nga gipanguluhan sa El Shaddai.
Ang CCVP adunay 600 ka mga kaalyadong Catholic communities ug mga organisasyon sa tibuok nasud, diin gimugna kini aron sa pagtabang sa mga kandidato nga pro-life ug pro-family ang baruganan.( /EIM) (FREEMAN)