CEBU, Philippines - Nabuslot ang tiyan sa usa ka lalaki nga natulog kauban sa iyang sakop sa pamilya sud sa ilang balay dihang kalit gipusil alas-11 pasado ang takna sa miaging tungang gabii sa sitio Ubos sa barangay Poblacion, lungsod sa Cordova.
Si PO3 Erwin Hedorio sa kapolisan sa maong lungsod miila sa biktima mao si Alexander Berdin, 43, nagpuyo sa maong dapit samtang wala pa mailhi sa kapolisan ang mamumuno niini.
Sa imbestigasyon nga ilang gihimo, nahinanok na sa pagkatulog ang biktima kauban sa iyang pamilya dihang misud ang usa ka wala hiilhing lalaki ug gidiretso pagpusil ang biktima.
Daling midagan ang gikatahapan ug migawas sa balay ug wala na igkita pa sa mga nahigmata nga mga silingan sa biktima.
Matud pa ni Hedorio nga daling gidala sa Lapulapu City District Hospital si Berdin apan tungod sa kagrabihon sa naangkon samad pinusilan gibalhin kini ngadto sa Vicente Sotto Memorial Medical Center sa dakbayan sa Sugbo.
Si Hedorio miingon nga sa imbestigasyon nga iyang nasayran nga personal nga kasuko sa wala hiilhing lalaki ngadto sa biktima maoy hinungdan sa maong pagpamusil. Dugang pa niya nga ang biktima nga ilang gisukitsukit mitug-an ngadto kanila nga niadtong miaging bulan duna kini gikalalis nga kaubang drayber sa traysikad. (/EIM) (BANAT NEWS)