CEBU, Philippines - Giklaro ni Lapulapu City Mayor Paz Radaza nga walay sagol pamolitika ang selebrasyon sa Kadaugan sa Mactan.
Karong adlawa (Abril 26) hangtud ugma mahitabo ang mga dagkong kalihokan sa Kadaugan sa Mactan nga naglakip sa Rampada ug Reenactment sa Battle of Mactan.
Siya nagkanayon nga anang mga adlawa nagsabot sila sa iyang City Council nga isalikway una ang pagpangampanya ug nagkasabot sila nga dili sila mosuot sa ilang mga campaign uniforms aron dili masagulan og kolor sa politika ang maong selebrasyon.
Pero siya midugang nga dili sila makabuot kung adunay laing mga kandidato nga motungha anang maong kasaulugan ug mangampanya sa publiko.
Ang partido DERETSO ni Radaza motuman sa pahimangno sa Commission on Elections (COMELEC).
Sa laing bahin, gibansaybansay sa kapolisan sa dakbayan ang mga vendors aron sa pag-ila sa mga matang sa bomba nunot sa umaabot Kadaugan Street Party o KSP.
Si Lapulapu City Police Office Operation Chief ug hepe sa Tourist Police Supt. Percival Zorrilla maoy nangunay og bansaybansay sa 210 ka mga vedors sa KSP uban ni Sr. Insp. Jacinto Mandal ug SPO2 Rolan Mellior sa Bomb Squad sa Lapulapu SWAT.
Ang pagbansay gihimo nunot sa nahitabong Boston marathon bombing sa Amerika atol sa usa ka marathon competition.
Giawhag sa kapolisan ang mga vendors nga magmatngon gyud sa tanang mga butang nga biyaan diha sa ilang palibot ug uban pang mga kadudahang materyales ug kinahanglang ipahibalo dayon kini kanila.( /EIM) (BANAT NEWS)