CEBU, Philippines - Usa ka tawo nga gituohang nalambigit sa mga tulis sa Metro Cebu ang nasikop sa kapolisan sa Investigative and Detective Management Bureau (IDMB) human iyang mga silingan ang mireklamo nga nagwara-wara kini sa iyang armas gawas sa iyang panimay diha sa may Upper Tingub dakbayan sa Mandaue.
Si Rey "Tootskie" Vicente, 30, nga taga Gingoog, Misamis Oriental ug temporaryong nagpuyo diha sa may Upper Tingub ang gisikop sa operatiba sa IDMB human mangahadlok iyang mga silingan nga nagwara wara kini sa iyang .45 nga pistola.
Nakuha gikan kaniya ang usa ka .45 nga pistola nga adunay 13 ka buhing bala, usa ka granada ug medium pack nga gidudahang shabu nga gibana-banang mokantidad nga P20 mil.
Si Sr. Insp. Ramil Morpos nagkanayon nga misuway unta og dagan aron motago si Vicente apan ilaha kining gigukod maong miisa na lang kini sa iyang mga kamot.Si Morpos nagkanayun nga ilang i- turn-over ngadto sa PNP Crime laboratory ang shabu samtang iturn-over usab nila ngadto sa buhatan sa Firearms, Explosives, Security Agency Supervisory Section (FESSAGS) ang pusil ug granada.Kasong kalapasan sa Comelec gun ban, illegal possession of firearms ug paghupot og ginadiling drugas ang giatubang karon sa suspetsado. (/EIM) (BANAT NEWS)