CEBU, Philippines - Ginganlan og “gahi’g ulo†ni Lapulapu City Mayor Paz Radaza ang tag-iya sa TV commercial sa EQ diaper gumikan sa padayon niini nga pagpagawas sa telebisyon.
Matud pa ni Radaza paningkamotan sa siyudad nga himoon ang tanang legal nga lakang batok sa tag-iya sa maong commercial nga matangtang kini sa kahanginan sa dili pa ang Kadaugan sa Mactan.
Hinoon mapasalamaton kini sa mga sakop sa Ad Standards Council o ASC nga mihimo og daling aksiyon sa National Historical Commission (NHC) sa pagpahunong sa maong pahinumdum, apan kagahapon aduna gihapoy mga tv stations nga nagsige og pagawas niini. Gipasalamatan usab ni Radaza ang mga tawo nga misuporta sa maong kawsa ilabi na sa mga midapig kaniya pinaagi sa social media networking site nga nakapapukaw sa mga sakop sa NHC.
Gumikan niini nanghinaot si Radaza isip pagtahod sa Unang Bayani sa nasud nga si Datu Lapulapu mawagtang na ang maong pahinumdum sa dili pa ang kasaulogan sa Kadaugan sa Mactan karong Abril 27 ning tuiga.
Kung magpadayon gihapon ang maong pahinumdum sa diaper sa mga television ang Lapulapu City Legal Office mapugos og pagpasaka og kaso batok sa advertiser ug sa tag-iya niini.
Kahinumduman nga nadawat na sa Ad Board ang mando sa NHC sa pagpaputol sa maong pahinumdum human mireklamo ang kagamhanang local sa dakbayan sa Lapulapu gumikan sa pagbugalbugal sa historical value sa kasaysayan sa isla sa Mactan uban ni Datu Lapulapu. (BANAT NEWS)