CEBU, Philippines - Level 2 drug pusher sa lungsod sa Dalaguete nga nakaeskapo sa buybust operation apan napusilan nadakpan sa sud sa Cebu City Medical Center sa Cebu City.
Nasikop usab ang anak niini ug laing pito ka tawo atol sa gipahigayong buybust operation diha sa sitio Carpio barangay Tuba.
Ang nasikop sa tambalanan mao si Wilfredo Calma Muñoz alyas Edo.
Nadakpan usab ang anak niini nga si Mark Raymund, kauban niining si Jefferson Mangapis Antipala. Samtang giingong naaktuhan usab nga nag-pot session silang Joey Boy; Ariel Gonzaga, Alvin Gonzaga, Aldred Saevilla; Wilmar Lataza ug Junel Paz nga giingong pulos taga lungsod sa Argao.
Matud pa sa hepe sa kapolisan nga si Insp. Dexter Basiergo nga human sa usa ka bulan nilang surveillance sa illegal nga kalihukan ni Edo mipahigayon sila og buybust operation.
Apan human sa transaksyon ug natunol ni Edo ang usa ka paketeng shabu sa police nga poseur buyer nakabantay kini sa pag- senyas sa police maong mikaratel kini og balik sa iyang kwarto.
Miikyas ug gipabuthan ni Edo ang usa ka polis hinungdan sa pagbawos ni Basiergo og pusil sa suspek.
Nakadawat na lang sila og taho nga nagpatambal si Edo sa Cebu City Medical Center, naigo kini sa bugan.
Nakuha sa pagpangronda sa kapolisan ang 61 ka pakete nga gituohang shabu gikan sa anak ni Edo nga si Mark Raymund ug Antipala.
Usa ka granada nakuha gikan ni Antipala ug duha ka armas nga kalibre .38 ug .357 ang narekober sa kapolisan nga gitagoan sa usa ka drawer. (BANAT NEWS)