CEBU, Philippines - Gihimakak ni Kongresista Eduardo Gullas sa unang distrito sa probinsiya ang kabahin sa mikatap nga report nga giingong nasuko siya sa presidente sa Talisay City College nga si Tomas Ramos hinungdan nga iyaha kining gitaktak sa pwesto.
Kahinumduman nga mikatap ang isyu sa Talisay kabahin sa giingong text messages sa tinun-an sa Talisay City College (TCC) nga miawhag sa ilang mga kaubang estudyante nga dili pabotaran si Gullas kinsa nagpapiling mayor sa siyudad sa eleksiyon sa sunod buwan isip simpatiya nila kang Ramos.
Giingong si Gullas nakigkita kini kang Ramos ug mihangyo nga pabotaron kaniya ang mga estudyante sa TCC apan giingong gibalibaran ni Ramos ang Kongresista hinungdan nga nasuko kini ug giingong gipalagpot sa pwesto ang presidente sa TCC.
Matud ni Gullas nga wala siya’y authority sa pagpahawa kang Ramos sa pwesto ug wala usab siya makigkita niini.
Giingong kung si Gullas maoy molingkod nga mayor sa siyudad dili na gyud niini i-renew ang kontrata ni Ramos isip presidente sa TCC. Apan matud usab sa Kongresista nga ang mohukom niini ang Board of Trustees (BOT).
Ang mga magtutudlo usab sa TCC giingong wala na motungha sa eskwelahan isip simpatiya nila kang Ramos apan matud ni Gullas nga posibleng nahuman na ang ilang kontrata ug niining panahona summer walay klase sa TCC.
Ang mga magtutudlo ug lakip na si Ramos ubos sa kontrata ang ilang serbisyo diha sa TCC.
Niadtong buwan sa Marso niining tuiga napupos na ang kontrata sa mga magtutudlo ug karong Hunyo 30 niining tuiga mapupos na usab ang kontrata ni Ramos. (BANAT NEWS)