CEBU, Philippines - Lain-laing kalibre sa armas, mga bala ug ginadiling drugas dihang gironda sa kapulisan ang pinuy-anan sa gidudahang mieskapo sa prisohan nga nalambigit sa negosyo sa ginadiling drugas sa barangay Somon sa lungsod sa Tuburan niadtong Sabado sa alas 6:00 sa buntag.
Nakasibat hinuon ang gitumbok nga suspek nga si Johnny Ylanan, molupyo sa maong lugar apan nadakpan ang duha ka mga bata-bata niini nga sila si Ronnel Manirong, 21, taga barangay Otso ug Abraham Brigole, 30, ug taga barangay Dakit lungsod sa Sogod.
Matud ni PO1 Joseph Bejer sa Tuburan Police nga apil sa niresponde sa alarma dihang nahinabi sa Banat News dunay concerned citizen ang nitimbre bahin sa mga suspek diha sa maong panimalay nga mga armado ug gika-report pa nga namaligya og ginadiling drugas.
Apan sa nakabantay ang mga suspek tungod sa kusog nga paghot sa mga iro hinungdan nga nakahigayon og eskapo ang target nga si Ylanan apan naabtan ang duha niya ka mga sakop.
Nakuha gikan sa duha ang mga armas nga kalibre .45 dunay mga bala ug magazine ug usa ka Ingram submachine pistol nga dunay duha ka magazine ug shotgun nga dunay mga bala.
Dugang mga bala sa 9mm caliber ang nakuha sa kapolisan ug duha ka dagkong pakete ug laing unom ka mga gagmay nga paketeng may sud nga gidudahang shabu .
Subayon pa usab ang report nga si Ylanan pugante sa Cebu Provincial Detention and Rehabilitation Centre. (Darrel A. Carumba/EIM) (BANAT BALITA)