CEBU, Philippines - Nahibaw-an sa mga konsehal sa dakbayan sa Sugbo nga si Mayor Michael Rama mipirma og kontrata uban sa pribadong kontraktor alang sa paghimo’g P50.4 milyones nga karsada diha sa South Road Properties (SRP) nga walay pagtugot sa konseho.
Ang mga konsehal nagkanayon nga samtang ang mayor gitugotan nga makapirma og kontrata sa ngalan sa dakbayan apan kinahanglan kini og pagtugot sa Cebu City Council. Si Konsehal Margarita “Margot†Osmeña, pangulo sa Committee on Budget and Finance sa City Council, nagkanayon nga wala mohatag ang konseho og pagtugot ni Rama nga makapirma og kontrata sa maong proyekto.
Si City Administrator Jose Marie Poblete abtik kaayo nga midepensa ni Rama ug miingon nga dihang giaprobahan sa konseho ang Annual Budget giklaro didto ang mga proyekto nga gastohan sa P100 milyones nga SRP lump sum budget.
Gikwestyon usab ni Osmeña ang pagpahigayon og bidding sa mga sakop sa Bids and Awards Committee (BAC) bisan og walay pirma ang city treasurer kun aduna ba’y kwarta nga magamit sa proyekto. Ang 2.2 kilometros nga karsada nga buot ipahimo ni Rama diha sa utlanan sa SRP ug Pond A gitumong aron kaagian sa Bus Rapid Transit (BRT) kun hingpit nga mapatuman ang maong transport system.
Apan si Osmeña nagkanayon nga dili angay dali-dalion ang proyekto tungod kay gipasuspenso pa karon sa National Economic Development Authority (NEDA) ang gisugyot nga BRT project.
Si Engr. Bernabe Gelbor nga maoy tag-iya sa Supreme ABF Construction nga maoy nakadaug sa proyekto mipasalig nga bisan og nahatagan na siya og Notice to Proceed sa proyekto dili siya mosugod kun way “go signal†sa konseho. (/EIM) (BANAT NEWS)