CEBU, Philippines - Usa ka inahan ang gipadakop sa barangay kapitan sa usa sa mga barangay sa lungsod sa Tabogon human gireklamo sa anak nga maoy mibugaw kaniya aron pahimuslan sa mga lalaki sud sa ilang balay.
Ang biktima nag-edad pa og 13-anyos sumala pa ni PO1 Janeth Moralde ang Women’s Desk investigator sa maong lungsod.
Matud niya dunay mga garas-garas sa kalawasan ang bata ug duna usab kini samad nga inagian sa paghiwa sa gunting dihang gidala sa ilang buhatan.
Matud pa ni Moralde sa Banat News, gikulata sa 40-anyos nga inahan ang anak niadtong Martes dihang wala siya mosugot sa buot mahitabo sa inahan nga ipagamit siya sa usa ka lalaki nga miadto sa ilang balay.
Sumala pa ni Moralde, nakaikyas ang bata kagahapon sa buntag ug midangop sa ilang barangay kapitan ug misumbong sa nahitabo kaniya.
Matud pa ni Moralde ilang nasayran gikan sa biktima nga dili kadto ang unang higayon nga gibuhat kadto sa inahan ngadto sa anak, kay niadtong Pebrero 4, ug petsa 18 ning tuiga gibugaw ang bata sa duha ka mga lalaki.
Giingong diha nahitabo ang pagpagamit sa bata sud sa ilang balay ug duna pay higayon nga nag-apong ang inahan samtang gibuhatan og malaw-ay sa mga lalaki ang bata.
Ang bata matud pa ni Moralde mitug-an nga gibayran ang iyang inahan og P500 sa maong tawo niadtong Pebrero 4 ug pagka-Pebrero 18, P200 ang gibayad sa lain na usab lalaki tungod gihapon sa pagpahimulos sa bata, ning adlawa gigamitan pa siya og kutsilyo aron hadlukon sa inahan aron mosunod sa buot niining mahitabo.
Apan matud pa ni Moralde, ang inahan sa bata mipasangil nga iyahang nakulatahan ang anak human niya masayring bisan kinsang lalaki na ang nakahilabot niini; dugang pa ni Moralde ang inahan mibutyag usab nga retobada ang anak ug tagdugay mouli. Midugang si Moralde nga ang suspek mipasangil usab nga tulo ka bulan nang dili magkatulgan ang bata sud sa balay kay adto ra kini matulog sa lantay sa gawas.
Ang biktima gidala na sa tambalanan aron ipatan-aw kung may kamatuoran ang alegasyon niini batok sa inahan samtang ilaha usab nga i-turnover ang bata ngadto sa social welfare workers aron maatiman.
Nagpaabot pa ang kapolisan sa resulta sa medical examination sa bata alang sa pagpasaka sa kasong human trafficking ug gisubay na usab kung si kinsa ang tulo ka mga lalaking mipahimulos sa biktima. (BANAT NEWS)