CEBU, Philippines - Usa ka gipasanginlang drug pusher ang napusilan patay samtang ang tulo ka kauban niini ang nadakpan atol sa buy-bust operation sa Barangay Tubod, Barili niadtong Abril 15, 2013 alas 12:30 sa hapon.
Si Cristituto “Roel†Barcenilla, lumulopyo sa Brgy. Esperanza, Aloguinsan, temporaryong nangabang og balay sa Brgy. Tubod, naigo sa dughan human napusilan ni PO3 Michael Cortes.
Gidala si Cristituto sa Barili District Hospital apan gideklarar kining Dead on Arrival (DOA) sa mga doktor.
Ang hepe sa Barili Police Station nga si Arvi Arbuis mibutyag nga si PO1 Florentino Cuadero Jr. maoy mitunol sa kwartang gipalit og illegal nga drugas nga gitunol ni Barcenilla, apan dihang misenyas na si Cuadero og backup nakabantay si Barcenilla ug gipusil si Cortes kaduha apan wala makaigo ug nabawsan kini.
Samtang ang mga nadakpan mao sila si Vincent Genelaso, 20, lumulupyo sa Brgy. Valencia, Carcar City; anak ni Cristituto nga 17-anyos; ug iyang amahan nga si Patrocinio Barcenilla,75, lumulupyo sa Brgy. Lawaan III, Talisay City. Nakuhaan sila og tulo ka gagmay’ng paketeng gidudahang shabu; P1,920 nga gituohang halin sa ilegal nga drugas; mga drug paraphernalia; usa ka .45 Colt pistol nga may serial number 107863, usa ka magazine nga dunay lima ka buhing bala; dugang 21 ka buhing bala sa .45 pistol; napulo ka bala sa 12 gauge shotgun; upat ka basiyo sa bala; driver’s license sa usa ka Navares, Allanlee Lacho, nga taga Barangay Paril, Barili; usa ka brown back pack ug tulo ka pouch bags.
Ang mga ginadiling drugas gidala didto sa Philippine National Police Crime Laboratory-7 Camp Sotero Cabahug, Cebu City.
Base sa impormasyon nga nadawat, si Cebu Provincial Police Office (CCPO) Director Patrocinio Comendador nagkanayon nga si Barcenilla usa ka miyembro sa Kuratong Baleleng Gang. (BANAT NEWS)