CEBU, Philippines - Gipanghinaot ni Comelec Provincial Election Officer Ferdinand Gujilde nga magmalampuson ang Peace Covenant nga gipirmahan sa mga politiko sa lalawigan.
Ang pamahayag ni Gujilde may labot sa mga peace covenant nga gikasabotan sa mga kandidato sa mga lungsod sa Sta. Fe ug Pinamungahan ug sa dakbayan sa Toledo alang sa piniliay sa Mayo 13. Gitataw ni Gujilde nga ang pagpirma sa Peace Covenant dili molampus kung ang usa ka kandidato manikas pinaagi sa vote buying, paggamit ug pagpahimus sa mga butang nga iya sa goberno sama sa mga sakyanan ug uban pa.
Matud pa niya, dili usab garantiya nga ang maong covenant makapawala sa hingpit sa mga pinusilay, kagubot ug pinatyanay panahon sa election.
Busa matud pa ni Gujilde nga ang gikinahanglan mao ang ligdong, tinarong nga pangampanya sa kandidato nga gusto og kalinaw ug hinlo nga resulta sa piniliay.
Samtang ang kapolisan dako kaayo og ikatabang sa pagpatunhay sa kalinaw ug kahusay sa matag suok sa lalawigan sa Sugbo sa adlaw sa piniliay.
Bahin sa Comelec gun ban, si Gujilde nagkanayon nga nasayran niya nga ubay –ubay na ang nadakpan sa kapolisan nga milapas sa maong balaod.
Hinuon matud pa niya nga mas bug-at ang silot nga atubangon sa mga malapason niining panahon sa election kay sa ordinaryong mga adlaw. Midugang si Gujilde nga ang balaod balaod gyud ug kadtong molapas niini siya ra sa iyang kaugalingon maoy mabasul.( /WC) (BANAT NEWS)