CEBU, Philippines - Hunongon ang pag-ayo sa Marcelo Fernan Bridge atol sa kasaulogan sa ika- 492 nga Kadaugan sa Mactan karong Abril 26 ug 27 niining tuiga.
Si Peter Dy nga maoy operation manager sa PLD Construction mitug-an sa mga tigbalita nga mosanong sila sa hangyo sa kagamhanan sa dakbayan sa Lapulapu sa pagpahunong temporaryo sa ilang trabaho sa maong mga adlaw.
Ang Abril 27 maoy adlaw sa tinuig nga pagsaulog sa “Kadaugan sa Mactan†diin ipahigayon usab ang reenactment sa makasaysayanong panag-engkuwentro nila ni Ferdinand Magellan ug Datu Lapulapu niadtong Abril 27, 1521.
Samtang gikan sa 24 oras nga trabaho matag adlaw sa pag-ayo sa maong taytayan, gihimo nalang 8 oras karon, matud ni Dy.
Kini tungod kay matag alas 10:00 na sa gabii hangtud alas 6:00 sa buntag ang ilang pagpangayo sa mga ayuhonong bahin sa maong taytayan .
Kini sa paglikay nga madisturbo ang dagan sa mga behikulong de motor nga moagi niini, sumala pa ni Dy.
Ang maong taytayan nga nagdugtong sa dakbayan sa Mandaue ug dakbayan sa Lapulapu gawas nga giayo usab ang iyang mga expansion joints , gipaaspalto usab kini.
Mokabat sa P27 milyones ang kantidad nga gigahin sa nasudnong kagamhanan alang sa maong proyekto sa pag-ayo. (BANAT NEWS)