CEBU, Philippines - Usa ka balay-patigayon nga namaligya og mga ilimnon nga makahubog sa Barangay Mabolo , dakbayan sa Sugbo gireklamo sa usa ka konsehal kay nakamugna og grabeng kasaba panahon sa lawom na nga gabii ngadto sa kaadlawon.
Si Konsehal Efren Sanico mipadala og suwat ngadto sa konseho sa dakbayan ug namasin nga matabangan sila pagpahunong sa tagdumala sa Tree Lounge and Restaurant sa pagmugna og kasaba.
Ang maong balay-patigayon anaa mahimutang sa sudlonon nga bahin likud sa usa ka kan-anan nga namaligya og “seafoods†nga mga sud-an. Matud ni Konsehal Sanico nga ang tagdumala sa maong imnanan nakalapas sa lagda sa Anti-Noise Ordinance sa dakbayan kay ang iyang balay-patigayon nakamugna og grabeng kasaba nga nakatugaw sa pagpahuway sa katawhan.
Likud sa maong balay-patigayon adunay daghang mga balay kang kansang mga nagpuyo matud sa konsehal dugay ra nga nagreklamo tungod sa kasaba. Ang lagda nga gilatid sa Anti-Noise Ordinance mao nga ang tag-iya sa mga balay-patigayon nga adunay gi-operate nga sound system kinahanglan nga magbutang og sound reduction devices aron sa pagpugong sa kasaba nga madungog sa gawas.
Ang maong isyu gitugyan sa City Legal Office aron kahimoan og dugang aksyon. Sagad nga himoon mao ang pag-inspection sa balay-patigayon basi sa oras nga gireklamo. – (BANAT NEWS)