CEBU, Philippines - Usa ka gipasanginlang ‘shoplifter’ ang namatay sulod sa Security Office, 4th floor sa usa ka dakong department store sa dalan Colon ning dakbayan sa Sugbu niadtong milabay’ng adlaw.
Matud pa nga ang maong lalaki giilang si Mario Alfie Ducayan y Mirador, 23, estudyante sa usa ka vocational course, nga taga barangay Tuyan, sa siyudad sa Naga.
Sumala pa sa report sa Homicide Section sa Cebu City Police Office, si Ducayan gidala sa maong opisina human masakping mikuha sa usa ka “Sandugo†nga tsinelas nga nagkantidad og P360.
Matud pa sa imbestigasyon ni SPO4 Alex Dacua nga gikahinabi sa Banat News, nasakpan si Ducayan sa usa ka lady guard nga si Margie Gacer y Briones, 22, sa maong establisamento.
Gidala si Ducayan nila ni Mauncio Doblados Jr. y Abella, 36, Chief Security sa maong tindahan ug Jeoffrey Aquino y Quinal, 31, ang CCTV Operator; Cezar Celerio y Illustrisimo, 28, plainclothes guard diha sa Security Office aron sukit-sukiton.
Apan matud pa sa alegasyon sa maong mga gwardiya dihang ilaha na unta kining posasan milugnot kini ug matud pa kalit nga natumba ug nagbula ang baba.
Ang company nurse nga si May Nina Lim misuway og hatag og Cardiopulmonary Resuscitation (CPR) ug gidala kini sa Cebu City Medical Center (CCMC) apan patay na kini.
Matud pa ni Dacua dili pa sila makahatag og dugang impormasyon kabahin sa maong hitabo hangtud nga dili mogawas ang resulta sa awtopsiya sa patay’ng lawas kung gikulata o may bun-og ba kini sa lawas nga nakaingon sa kamatayon sa biktima.
Ang Banat News misuway sa pagtawag sa management sa maong department store apan walay motubag sa telepono sa ilang manager. (Genevieve Dejitos, CNU Intern/EIM)
Tomas di
mosuon ni
Rama
Wala mabalaka si Kongresista Tomas Osmeña nga malupig siya ni reelectionist Mayor Michael Rama sa pagpangampanya tungod lang kay si Rama mosayaw ug mokanta sa matag pulong-pulong ingon man sa ubang kalihukan nga tambongan niini.
Si Osmeña miingon nga anaa ra ni Rama kun unsaon niya pagkombinsir ang katawhan aron adto mobotar kaniya sa eleksyon karong Mayo 13 apan dili siya mosundog sa pagsayaw ug kanta atubangan sa mga botante.
Ang kalainan ni Rama ug Osmeña mao nga si Tommy seryoso nga matang sa pagkatawo nga panagsa ra mopahiyom. Ang iyang mga suod nga higala wala gani makahinumdom nga nakakita sila ni Tommy nga mibahakhak og katawa.
Si Rama sa iyang bahin, kanunay nga magngisi, mosayaw ug mokanta pa atol sa mga kalihukan anha sa City Hall apil sa pipila ka pulong-pulong sa kabarangayan.
Sa kampanya, seryoso si Osmeña nga mobatbat sa mga isyu ug sa iyang mga plano kun mapili siya pag-usab pagkamayor.
Apan dili usab magpabentaha si Rama kay matud niya dugay na niya nga pangandoy nga palamboon gyud ang dakbayan sa Sugbo atol sa iyang administrasyon.
Niining mga adlawa nga nagsingabot na ang eleksyon, silang duha pareho nga nangangkon nga nag-una sila sa ilang mga surveys. (BANAT NEWS)