CEBU, Philippines - Nagbuy-od nga wala nay kinabuhi ang usa maintenance utility man human unaya og dunggab sa iyang pag-umangkon sa Villa Leyson, Phase 2B sa barangay Bacayan, dakbayan sa Sugbo kagahapon sa ala 1:00 pasado sa kaadlawon.
Ang biktima nailhan nga si Felimon Lapera, 50, usa ka maintenance utility man sa maong subdivision samtang ang gitumbok nga responsabli mao ang iyang pag-umangkon nga si Marino Inanoria, 25.
Ang gwardiya sa Villa Leyson nga si Jeepy Lanorias, mibutyag nga sa sayo pa nakabantay siya og duha ka lalaki nga nag-agbay nga mura og naghagwa .
Apan natingala si Lanorias kay paingon man sa libon ang duha unya nakita niya nga nahagba sa yuta ang usa niini.Unya midagan ang usa ug gibiyaan ang kauban niini sa maong dapit ug dihang gisusi sa mga kabanay nasuta nga ang tawong nahagba mao si Lapera.
Sa pasiunang pakisusi sa kapolisan ilang nasayran gikan sa mga kaliwat sa biktima nga sa wala pa mahitabo ang pagpanunggab nag- inom pa ang biktima ug ang suspetsado uban sa laing kaliwat niini sa usa ka tindahan.
Apan ang suspetsado giingong nagkalalis ug ang lain niyang paryente nga nailhang Ryan nga misangpot sa ilang pagsinumbagay.
Dihang mipauli na ang suspetsado sa ilang balay giingong gisundan kini sa biktima busa sila na usab ang nagkalalis nga misangpot na sa pagpanunggab.
Didto sa maong dapit guyora sa suspek ngadto sa kalibonan ang biktima ug gibiyaan nga wala nay kinabuhi.
Nasuta nga nasugamak ang biktima sa duha ka samad sa walang dughan ug laing duha usab ka samad sa wala gihapon niyang kilid nga maoy hinungdan sa iyang kamatayon.
Matud ni SPO4 Alex Dacua sa Homicide Section sa Cebu City Police Office nga ang gihulagway sa gwardiya nga lalaki nga kaagbay sa usa nga nahagba sa yuta ug gibiyaan niini, misakar usab sa pamarog sa suspetsado hinungdan nga ila kini nga gidala aron ipaubos sa imbestigasyon.
“Mao ni siya amo rong unang giimbestigahan,actually siya ang tawo nga katapusang kuyog sa biktima,†sumala pa ni Dacua.Apan gipanghimakak kini sa suspek atubangan sa mga kapolisan. (BANAT NEWS)