CEBU, Philippines - Patay na nga nakaplagan ang usa ka kawani sa Lapulapu City Assessor’s Office nga dalagang-guwang nga may samad tinigbasan sa tangkugo nga nagluhod sa ilang kusina sa balay diha sa sitio Kapiles sa barangay Suba-Basbas, dakbayan sa Lapulapu alas-8 pasado ang takna kagahapon sa buntag.
Si PO1 Jomar Tolentino sa Homicide Section sa kapolisan sa maong dakbayan miila sa biktima nga mao si Flora Amodia, 55.
Sumala pa ni Tolentino nagbanaw sa dugo sa biktima ang kusina sa panimalay niini nga gisud sa wala mailhing kawatan nga miguba sa bintana pinaagi sa pagtangtang sa jalousy blades niini. Matud pa ni Tolentino nga usa ka 8- anyos nga batang babayeng kauban sa biktima mibutyag nga nakakita siya sa maong hitabo apan nagpakaaron-ingnon lang kining natulog nga naghigda sa katre.
Ang maong bata mitug-an nga nag-inusara lang ang wala mailhing lalaki nga misulod sa panimalay sa iyang iyaan. Matud niya nagsul-ob kini og puti nga t-shirt ug nag-short pants.
Matud pa ni Tolentino, si Rosario Pugoy nga igsoong babaye sa biktima kinsa mibisita sa panimalay natingala nga walay nangabli kaniya hinungdan nga nagpatabang siya kang SPO2 Rodrigo Amistad nga ilang silingan kinsa nadestino sa Regional Intelligence Division (RID) sa Police Regional Office 7. Gitataw ni Tolentino nga walay kaaway ang biktima base sa nahipos nila nga kasayuran gikan sa mga silingan tungod kay relihiyosa man kini ug mahigalaon.
Nagtuo ang kapolisan nga gitulis ang biktima kay gipangguba na man ang cabinet sa sulod sa panimalay niini.
Dako ang ilang pagtuo nga misukol ang biktima base sa ilang nakaplagan sa crime scene nga mga buhok nga natagak ug nagkatuali nga mga butang sa kusina.
Dugang pa niya nga ang Scene of Crime Operation (SOCO) sa PNP naghimo usab og pakisusi pinaagi sa pagkuha sa fingerprint nga gituohang iya sa wala hiilhing mamumuno. (BANAT NEWS)