CEBU, Philippines - Ang Special Weapons and Tactics (SWAT) sa Cebu City Police Office maoy nag-una sa laing lima ka mga SWAT team sa nagkalainlaing police headquarters sa tibuok Central Visayas atol sa ikaduhang Police Regional Office (PRO)-7 Inter-SWAT Competition.
Ang ikaduhang team sa CCPO nag-una sa tulo ka hugna sa ilang test of speed and accuracy sa laing mga kaubanang team niini.
Kini ang ikaduhang higayon nga nakab-ot sa CCPO ang labing taas nga score labaw sa ubang mga unit sa tulo ka adlaw nga bangga nga nagsugod niadtong Biyernes.
Ang giila nga Best Equipped unit mao ang Lapu-Lapu City Police Office (LCPO) ug ang gitawag nga Most Organized team mao ang Bohol Provincial Police Office.
Ang tanang team nagsangka sa tulo ka nagkalainlaing hugna nga naglakip sa counter ambush drill sa unang hugna, night assault sa ikaduha ug ang bus assault sa ikatulong hugna.
Si Police Regional Office (PRO)-7 Director Marcelo Garbo Jr., nagkanayon nga ang maong kompetisyon maoy tinuig nga kalihokan PRO-7 nga angayan untang ipahigayon sa ikatulo ug ika-upat nga quarter sa tuig.
Apan gumikan sa pagpangandam sa kapolisan sa umaabot nga election s a Mayo 13, gihimo nalang kini og sayo, sumala ni Garbo.
“Timing lang ito for the 2013 election in case of scenarios or contingencies, the SWAT can respond easily,†matud ni Garbo.
Ang nahisgutang kompetisyon gitumong aron labing mahanas ang mga miyembro sa SWAT sa angay nilang buhaton sa matag karon ug unya nga motubag sila og mga dagkong alarma, matud pa ni Garbo. (BANAT NEWS)