CEBU, Philippines - Gidakop sa kapolisan ang bana nga gidudahang miunay og patay sa iyang asawa didto sa barangay West Poblacion siyudad sa Naga niadtong miaging kadlawon.
Ang asawa nga patay nang nahidangat sa Minglanilla District Hospital mao si Endrebia Alfar, 46, minyo ug molupyo sa nahisgutang lugar.
Samtang bana nga gidudahang maoy mipatay sa biktima mao si Francisco Alfar, 49. Si PO1 Jimlani Alrasid sa Naga City Police Station mibutyag sa Banat News nga ang suspek mao mismo ang mihatud sa patay na niyang asawa sa Minglanilla District Hospital alas 12:45 ang takna sa kaadlawon ug gitug-an niini sa mga doctor nga giatake sa sakit ang biktima.
Tungod kay patay na kini, gideretso na lang kini paghatud ngadto sa Holy Spirit Funeral Homes sa Minglanilla, apan didto nadiskobrihan sa embalmer nga adunay samad pinusilan sa tiyan ang biktima hinungdan nga gi-report dayon nila kini sa kapolisan. Daling mirespondi ang mga polis ug nasikop ang suspek sa alas 11:20 sa kagabhion sa maong adlaw ug gilabhug dayon kini sa prisohan
Si Melinda nga kamanghurang anak sa magtiayon mibutyag sa mga tigbalita nga nanan-aw pa sila og telebisyon uban sa biktima dihang mibiya siya sa pagpakatulog sa iyang anak.
Apan nakurat siya dihang nabati niya ang singgit sa iyang inahan nga nangayo og tabang.
Matud pa niya nga nahagba sa sawog ang iyang inahan ug dihang naabot kini sa hospital wala nay kinabuhi. Ang kapolisan padayon pa sa pag-imbistigar sa suspek aron pagtino unsay hinungdan sa iyang pagpatay sa kaugalingon niyang asawa. (BANAT NEWS)