CEBU, Philippines - Kasong kalapasan sa "Anti-Human Trafficking" unya ang posibleng ipasaka sa kapolisan sa Mactan Cebu International Airport batok sa duha ka babayeng unang gi-reklamong migamit og credit card sa laing tawo apan nahibaw-ang nagdala usab diay og duha ka mga minors padung sa Luzon.
Ang duha nga gi-turnover na karon ngadto sa National Bureau of Investigation mao sila si "Rhea" ug "Princess" , pulos taga dakbayan sa Cavite.
Duha ka mga dalagita nga taga barangay Guadalupe sa siyudad sa Sugbu nga nag-edad og 16 ug 17-anyos ang na-rescue sa mga awtoridad gikan sa duha ug gi-turnover na ngadto sa rehiyonal nga buhatan sa Department of Social Welfare and Development.
Base sa taho ni Capt. James Beloy, hepe sa Intelligence and Investigation Division sa Airport Police District sa MCIAA ug APD Corporal Emmanuel Concepcion ngadto ni Emergency and Security Services Department (ESSD) Manager Ret. Sr. Supt. Melvin Gayotin ang duha nasikop alas 8:45 sa miaging gabii.
Sumala pa nga padung na unta mosakay ang duha sa Tiger Airways padung sa kaulohan dihang sila gipugngang makalarga.
Matud pa nga usa ka Delfin Cuevas nga taga English V. Rama dakbayan sa Sugbu ang mireklamo sa ESSD tungod kay gigamit sa duha ang iyang credit card aron pagpalit og tiket sa eroplano padung sa Cavite.
Sumala pa nga kapin sa P8 mil ang nakuha sa iyang credit card ug sa ilang pagsusi nasuta nga ang mga suspek uban sa duha ka minor de edad ang nakabutang sa maong ticket nga gipalit gamit ang iyang credit card.
Atol sa imbestigasyon, diha nahibaw-an sa kapolisan nga ang duha ka minor nga kauban sa duha giingong gi-recruit sa duha aron patrabahuon didto sa usa ka club sa Bacoor, Cavite.
Gawas sa paglapas sa trafficking law, mag-atubang usab ang duha og laing kaso nga qualified theft nga ipasaka ni Cuevas tungod sa paggamit sa credit card niini nga wala’y pagtugot niya. (/EIM) (BANAT NEWS)