CEBU, Philippines - Walay foul play nga nahitabo sa giingong pag-pinusilay sa manag-agaw nga polis nga nahitabo sa milabay’ng semana kini base sa gihimong imbestigasyon sa kapolisan sa dakbayan sa Sugbo.
Ang maong resulta mitumaw dihang migawas ang ballistic examination ug ang gihimong re-enactment sa kapolisan sa Homicide Section nga mipahigayon sa imbestigasyon kalabot sa kamatayon nilang PO1 Anthony Gonzales ug PO1 Rey Gabutan.
Ang hepe sa kapolisan sa dakbayan sa Sugbo, Sr. Supt. Mariano Natuel Jr. mipadayag nga ang resulta sa ballistic examination ug crossmatching sa mga armas sa nangamatay diha sa crime scene migawas nga ang ilaha ra gyung armas ang nalambigit sa hitabo.
Gani ang usa sa na-crossmatch mao ang slug nga nahulbot gikan sa ulo ni PO1 Gabutan tungod kay nigawas sa crossmatching nga gikan kini sa armas ni Gonzales.
Giklaro usab ni Natuel nga ang resulta sa ilang findings ilang itandi sa resulta sa gihimong linaing imbestigasyon sa National Bureau of Investigation (NBI) nga gidangpan sa pamilya sa mga nangamatay. Gihangop ni Natuel ang imbestigasyon sa NBI aron sa pagwala sa mga pagduda sa uban.
Sa inisyal nga pag-asister sa kapolisan ug sa reenactment nga nahitabo, gikatahong si Gabutan mipahimangno kang Gonzales tungod sa batasan niini apan gikatahong nasuko si Gonzales ug mibunot sa iyang armas nga kalibre .45 ug gipusil si Gabutan.
Si Gabutan bisan og samdan mibunot usab sa iyang kalibre .38 ug gipusil si Gonzales ug naigo kini sa tuong dughan.
Wala usab matino kung asang dapita unang naigo si Gabutan ug nakabawos pa kini, apan base sa awtopsiya duna kini samad pinusilan sa tuong tampihak, tuong bukton, dughan ug tangkugo.
Ang pamilya sa duha ka polis pulos di makatuo sa rason sa pag-unay sa manag-agaw maong nagpatabang sila sa NBI. (BANAT NEWS)