CEBU, Philippines - Mga sugarol o operator og mga ilegal nga sugal ug mga opisyal sa barangay Dumlog, dakbayan sa Talisay isig bantayay lang kini.
Si Kapitan Charles Basillote sa Dumlog ug presidente sa Association of Barangay Captain nagkanayon nga padayon ang higpit nilang pagpaniid batok sa mga operator sa ilegal nga sugal diha sa ilang barangay.
Ang mga opisyal sa barangay higpit nga naniid sa mga sugarol aron ilaha kining masikop apan ang mga sugarol higpit usab nga nagbantay kanila ug magbalhin-balhin kini og lugar aron dili masikop.
Kahinumduman nga sa milabay’ng mga semana si Jebee Binghay sa Department of Social Welfare and Development (DSWD) main office mi-report sa Talisay City Police Station pinaagi sa pagtawag sa telepono kabahin sa mga menor de edad nga giingong gihimong kalasero diha sa usa ka pasugalan sa sitio Lemonsito.
Si Basillote nagkanayon kini nga ang maong lugar dili usa ka sitio sa ilang barangay gitawag lang kini og Lemonsitohan ug ilaha kining gisusi.
Nasuta sa mga opisyal sa barangay nga dunay nag-operate og hantak sa maong lugar apan pag-abot nila wala silay naabtan nga nagsugal ug wala usab silay nakitang mga menor. Gibutyag ni Basillote nga ang giingong maghantak diha sa lugar ang mga drayber sa traysikad nga ilahang gipangbadlong kaniadto nga maghantak diha daplin sa karsada.
Karon wala na tuod makitang naghantak diha sa daplin sa karsada apan padayon kini sa ilang pagsugal diha sa tago nga lugar.
Si Basillote midugang nga padayon ang ilang higpit nga pagpaniid batok sa mga ilegal nga sugal diha sa ilang lugar.
Kahinumduman usab nga si Basillote mibutyag kini nga dunay nag-operate ug masiao sa ilang lugar ug magbalhin kini og tali sa mga ilegal nga numero. Gawas niini ang maong mga ilegalista duna usab kini mga sakop nga magbantay sa mga opisyal sa barangay ug polis aron dili sila madakpan. (BANAT NEWS)